Sunday, January 17, 2010

لنعلمهم في الصغر + التاج

يأخذ الابن اباه المقعد الى المشفى
ويجلسه في قاعة الانتظار
ويضع بيده ورقة .. وهو يعلم انه لا يستطيع القراءة
ويخبره بأنه سيذهب ليتحدث الى الدكتور قليلا ويأتي


ينتظر الأب .. وتطول مدة الانتظار
ولا أثر للابن
يقلق الأب على ابنه .. يحادث نفسه
" لعله اصابه مكروه "
يحزن الأب .. وينتظر الى نهاية اليوم في كرسيه .. منتظرا لأبنه


يلاحظ الطبيب طيلة انتظار هذا الشخص
فيسأله في ريبة
مالك تنتظر هنا وقد رحل الجميع ؟
فيجيبه .. لقد أعطاني ابني هذه الورقة .. وطلب مني الانتظار
فتح الطبيب الورقة
  ...
اترككم مع الفيديو لتعلمو مافي الورقة









هذا الفيديو هو رسالة بسيطه نقدمها لكل أب وأم
علها تلامس القلوب ببساطتها
هي حل لظاهرة عقوق الوالدين
الحل بسيط
لنعلم اولادنا في الصغر
على الصلاة
وعلى النمو مع كتاب الله
فبهما يشعر المرء بعظمة البر بوالديه




الرسالة 
من مونتاج واخراج
طلال العلي
  فكرة التصوير .. وتصميم الفواصل
مريم العلي
تمثيل
بنات اخوي الثلاث .. اللي طلعولي قرون بالتصوير  :D
الله يحفظهم 


:)


------- 



















اشكر اختي
Pen Seldom
على هذا الاهداء
> كبير جدا علي !







1- اسمك واسم مدونتك؟ 


الاسم : طلال
اسم المدونة : الأمل موجود


2- احب الالوان؟ الايام؟ الارقام؟


اللون
 الأزرق .. احبه لأنه يريحني .. لذلك لون غرفتي ازرق :P 
الأسود .. احبه لأنه ملكي .. ولأنه يغلب عليه الطابع الحزين

الأيام 


الجمعة .. لأنه اليوم الوحيد اللي ما ادرس فيه :P


الأرقام


8 ... عدد ابواب الجنة
2 .. انا وهي   


برجك وتاريخ ميلادك؟

برجي
مادري .. ما اهتم


تاريخ ميلادي 

30-06-1988


ما أهم مميزاتك؟ وأهم عيوبك؟ وماهى الصفه التى تتمنى أن تتوفر فيك؟



مميزاتي


لما اقترف خطأ أعترف فيه وما أكابر 
وفي النقاش أناقش وصولا للحقيقة لا نصرة لمبادئي



عيوبي


أحب الوحدة .. واشتكي منها !!!
هذا عيب متناقض لم اجد له حل


وايضا .. حزين على رغم من خفة دمي
>> واثق :P

الصفة اللي اتمناها:


اللامبالاة .. لأني احاتي كثيرا


مكانك المفضل؟


اماكن كثيره ..لا احبها لذاتها لكن  احبها لأنها تحيي ذكريات جميلة اندثرت



هوايتك المفضله؟


كرة القدم, الكتابة, المونتاج سابقا , والانشاد سابقا


ما المقوله اللى تؤمن بها؟


ومن يتهيب صعود الجبال .. يعش ابد الدهر بين الحفر


اجمل هديه قدمت لك من مين؟

من اختي قبل جم اسبوع :D

اسعد يوم فى حياتك؟ واتعس يوم فى حياتك؟
أسعد يوم



لحظات كثيرة سعيدة بحياتي
منها  لما قريت ردودكم على اخر بوست لي


اتعس يوم


لما فارقني رفيجي وعديل روحي .. كنا ندرس مع بعض من الثانوية .. ودرسنا اول سنة جامعية مع بعض بالغربة
لكن لظروف خاصة .. قرر التراجع 
وبقيت وحيد .. حتى الآن



موقف طريف لا ينسى من ذاكرتك؟


هو موقف طريف .. اذا تذكرته .. لكن بحزت الموقف كنت مصدوووووم


كانت اول رده لي للكويت بعد اول شهوور من الغربة وكنت متحمس جدا
وكانت مدة الاجازة فقط ثلاث اسابيع
فحجزت تذكرة انا ورفيجي اللي قلت لكم عنه :P


وصلنا المطار متأخرين وطارت عننا الطيارة
ف رحنا ندبر امورنا


قالولنا ان مافيه طيارة الحين .. الا باجر


وانا قفلت .. الا نطيييير اليوم .. لأنه عطلتنا قصيرة .. 


فبعد البحث الدقيق لقو تذكرة


لكن لشخص واحد فقط


واحنا ثنين .. انا ورفيجي


يعني بس لازم واحد مننا يرووح !!!


طبعا انا كنت اعيش صراع داخلي.. بين الايثار .. والشوق الى الديار !!


فجأة !!


قالي رفيجي .. طلال انت روح !!


فانا رديت .. لا لا انت روح


>> على اساس اننا احنا نتعازم على التذكرة :P


فرد علي بسرعة .. اوكي 


ولف ظهر وحجز التذكرة !!!!!!!!!!!!




صدمة لووووووووووول





معاك ثلاث وردات لمين تهديهم ؟

الوردة الأولى : لجميــع أهلي وأصدقائي ..

الوردة الثانية : لحبايبي قراء المدونة 

الوردة الثالثة : أهديها لمدونتي نفسها .. لأنها جمعتني بناس شرواكم .. 

معاك ثلاث رصاصات على من تطلقهم؟


حمام السلام في قلبي يفزع من صوت الرصاص !



رايك فى الحب؟ ولمن تقول اجمل كلمه حب؟ 


الحب الحقيقي كسراب الماء في الصحراء .. قد يفنى عمرك سائرا نحوه ولا تجده 
وقد تحظى به فور اقدامك عليه
بكلا الحالتين .. انت من يتحمل خطورة المسير


اجمل كلمة حب اقولها لأي شخص احبه فالله
فهم أحق بها :)




هل من السهل أن تمثل الحب لشخص يحبك لعدم جرح مشاعره؟


لكل تمثلية نهاية .. فلم اجعل نهايتي مشوهة باقتنائي دور البطولة فيها؟


المرأة فى نظر الرجل ।........ أكمل ؟

النصف الاخر الذي لا تكتمل الحياة الا به

الرجل فى نظر المرأة......... أكمل؟

كل شي .. بعد والديها

ماهو اسعد خبر سمعته هذا العام؟ وماهو اتعس خبر؟


تونا مبلشين هالسنة :P




فتحت صندوق البريد لأجد به ظرفا كبيرا
فتحته متشوقا .. لأجد شهادات تقدير مرسلة لي من التعليم العالي تحثني على الاستمرار بالتفوق


---


الخبر التعيس.. هو اني ماخذ ماده عند دكتور محد مدحه لي لحد الحين .. وهو الوحيد اللي يدرس هالماده .. وهالماده هي من الثلاث المواد المهمة اللي تسجل بسجلك الدراسي
> مولاي سهل علينا :P



لمن تهدى التاج؟

لـ


Bookmark
حافية القدمين ولباسي المطر
جنون الصمت




=)





* سامحوني على الاطالة




27 comments:

BookMark said...

ما شاء الله الفيديو أكثر من رائع !
التصوير والمونتاج والإخراج .. والأصوات مؤثرة جدًا !!

وأهم شي الممثلات اسمالله عليهم ايشوقوون، الله يحفظهم :)

فعلا لنعلمهم في الصغر .. لنحصد أروع النتائج
***
اسمتعت بقراءة إجابات التاج .. ومواقفك الطريفة كالعادة :)

ومشكوور عالإهداء والله مقدرة أشد التقدير << أهم شي أشد :D

بس والله حاولت يمين يسار أحل بالأسئلة وايد صعبة .. مافي أسهل؟ ;P

أعتذر طلال والله ماأرد أحد بس أستصعب الأسئلة الشخصية

شكرًا مرة أخرى :)

حَافِـيَةُ الَقَدمَيّـنْ ولِبَاسِي المَطـرْ said...

كربووووونها تضحك وتمثل
الله يخليهم لكم إنشالله
عجبني اللي لابسه عباة سوده
نتفه :×
==
لوووول انت اليوم شكلك مارد
وانا فركت الفانوس :×
وانا اقرى اجوبتك قلت بقلبي
اذا وجهوا لي الأسئله شنو برد
لول وجان توجه لي التاج p;

بس صراحه اعجبتني اجوبتك
لقيت فيها حكمه كانت متواريه عن انظاري

موفق يارب , ومشكور عالتاج

لولا الأمل said...

BookMark

تسلمين اختي .. هذا من ذوقج
لووول الممثلات يشوقون من بعيد .. بس لا تقربين صوبهم

---

لووول .. مو انا اللي حاط الاسئلة والله

يتني جذي

ما يحتاج للعذر اختي

ولج كامل الحرية بالاختيار .. مو شي الزامي

اسعدني تواجدج :)

لولا الأمل said...

حَافِـيَةُ الَقَدمَيّـنْ ولِبَاسِي المَطـرْ

لووول .. هذي سارون
ما كنا بندخلها بالتصوير بس غارت من خواتها :P

---

لووول .. لا خيتي تستاهلين التاج
وناطرين اجوبتج على الاسئلة

تسلمين خيتو

اسعدني مرورج كالعادة

نمووول said...

عدل عدل طلع الابداع والشغل العدل
خووووش فيديو فكرة وتصوير واخراج
تسلم ايدك مخرجنا وايد المصورة
ويعطيهم العافية البنوتات
قواك الله وبارك فيك

تصدق توني اعرف انك شاب
وان اسمك طلال يعني فادني هالتاج

شكراً لك

:: بـوح الصمـت :: said...

السلام عليكم ورحمة الله وبركاته

لطالما إعتدنا الإبداع هنا مع البساطة وعفويّة الطرح والأهم الفائدة :)


بالنسبة للفيديو المونتاج جـداً جميل .. أهم شيّ الغرس في حياة الطفل " وينشأ ناشيء الفتيان مِنّا على ما كان عوده أبوه "

اسم الله على البنات .. ربّي يحفظهم ويقر أعينكم بصلاحهم ويجعلهم من حفظة كتاب الله ..


ما شـاء الله عليكم مُبدعين .. كثروا من هالشغـلات .. عفويّة لكنها تدخل القلب وتخلي الواحد يفكر لي بعيد :)


بالنسبة للإجابات صج ضحكني الموقف لووول !

شُــكراً لأنكم هنـا ..
=)

بـارك الله فيكم ..

أعتذر على الإطـاله ..

Engineer A said...

اللهم يحفظ الصغار يارب ويجعلهم من الأبناء الصالحين .. خوش فيديو وخوش بوست ..

وحلوة المعلومات اللي قدمتها عن نفسك وضحكني موقف رفيجك لوووووووول "هذا اللي ما صدق خبر" !! :))

يعطيك العافية

princess adadi said...

اهلا وسهلا

يعطيك العافية على الفيديو انت وكل طاقم العمل
فديتهم البنوتات والله

عسى الله يقدرنا على بر والدينا

لووووول موقف الايثار مع رفيجك مو صج
حده موخوش موقف

يعطيك العافية ^^

سمو الأميرهـ ..ツ said...

ما شاء الله عليهن
ربي يحفظهن لكم
**********
تعال جوف يهال بيتنا عفووييين جداً
بس لو جافوا الكيمرة يختبصون

مب مال تمثيل أبداَ ...

هههههههه

**********

فيديو رائع
وفعلا معاك بأن تربية الأطفال فالصغر
يحد
من
عقوقهم فالكبر


**********


قوآك الله أخوي

ومشكوور ع البوست

استمتعت فيه
:)

نبض الأدب said...

جمــيــل جدًا تبارك الرحمن
الله يحفظهم الأميرات الثلاث ^^
صج " البنون زينة الحياة الدنيا " ..ا

الفيديو بسيط ومعبر جدًا .. و وصّل الرسالة بأجمل ما يكون ..ا
ومثل ما يقولون [العلم في الصغر كالنقش على الحجر ] .. اللي يتربى من صغره تربية سنعة .. حتى لو يوم من الأيام عر شوي ـ وخصوصًا فترة المراهقة ـ لابد إنه يرجع لمنبته الصالح اللي نشأ عليه .. لأن الأساس كان قوي من البداية ..!ا
وجهة نظر =)

..عسى الله يبارك فيكم
بالتوفيق

L!fe said...

جميل جدا ما تم عمله وباتقان بصراحه ..
فيديو تعليمي جميل ..

جميل جدا ان نعلم ابناءنا الطاعه والخوف من الله عز وجل في الصغر .. حتى تترسخ هذه الافكار في اذهانهم عند الكبر
وكما يقولون العلم في الصغر كالنقش على الحجر ..

بارك الله فيكم جميعاً
وجعلكم جميعا من الذرية الصالحه المثمره ,,


وفقكم الله لما يحبه ويرضى ,,

صمت البوح said...

السلام عليكم,,

مادري كيف الواحد يهون عليه يخلي امه ولا ابوه فالمسشفى ولا اي مكان ويروح عنهم كيف يطاوعه قلبه!!

اصلا البيت بلاهم مايسوى
وحتى البيت بلا يدي ولا يدوه ماايسوى
هم نور البيت
يسدني قبل لا اطلع من البيت دعواتهم تسبقني!!

وصدق الواحد لازم يربي عياله ع الصلاه وبر الوالدين..واللي يخاف ربه مستحيل يسوي باهله جيه


الفيديو ع بساطته طالع وااايد حلو
الله يحفظ البنوتات ويخليهم لكم

واستمتعنا من اجاباتك ياخوي
ههههههه احلى شي الموقف يوم ربيعك اخذ التذكره هههههههههه


والله يعطيك العافية

صمت البوح said...
This comment has been removed by the author.
المنبر الكويتي said...

مبددددددددددددع يا بوحموود


والله اتشرف , ويزيدني شرف أني أكون صديق لشخصك الكريم
:)

<< بس ما أبي أكمل , أخاف يغارووون
:p

لولا الأمل said...

نمووول

يه يه يه .. استاذ نمول عندنا !
لو ندري جان فرشنا لك الارض زهور :)

الله يعافيك ويسلمك ويبارك فيك
واذا الله اراد بنحاول انه كل سنة ننزل فيديو بسيط يطرح رسالة :)

الحمدلله فادك التاج
:P

تشرفنا استاذي

لولا الأمل said...

:: بـوح الصمـت ::

الله يطرح فيج البركة اختي

ما قصرتي على هالتشجيع

همستينا والله اننا نزيد من هالنوع من الطرح

الله يجزاج خير

ويسعدني تواجدج :)

لولا الأمل said...

Engineer A

ربي يحفظ عيالكم ويخليهم لكم

لوووووول .. اي صدمني

بس يستاهلها والله :P

يسعدني تواجدج :)

لولا الأمل said...

princess adadi

الله يعافيج يا رب

ويخليلكم بناتكم

لوووول عاد والله كنت ناوي اعطيه برضاي

بس خذاها غصبن عني :P

حياج الله برنسس

يسعدني وجودج :)

لولا الأمل said...

سمو الأميرهـ ..ツ

لووول .. لو تشوفين الفيديو الحقيقي

طايحين فيهم زف عشان يصورون .. الله يعافي الخلفية الموسيقيه اللي مغطيه على الزف لووول

ان شالله دوم مستمتعه

يسعدني تواجدج :)

لولا الأمل said...

نبض الأدب

وجهة نظرج سليمة تماما .. وتجارب الحياة تثبتها

الله يعينا على تربية اولادنا بمثل هذي التربية

دمت بالقرب اختي

لولا الأمل said...

L!fe

الله يجزاج خيير ويبارك فيكم ان شالله

صدقتي لازم نزرع مثل هالقيم خصوصا بهالمرحلة من العمر

وفق الله لما يحب اختي

ويسعدني تواجدج :)

لولا الأمل said...

صمت البوح

اي والله .. هم نور البيت .. ودعواتهم تسبقنا

الله يعينا على برهم ونيل رضاهم

الله يحفظكم ويحفظكم بنوتاتكم يا رب

تسلمين اختي على تواجدج

: )

لولا الأمل said...

المنبر الكويتي

الابداع نستمده من منبركم

والله يابو يوسف مدحي لك ما راح يوفيك حقك .. وانت عارف هالشي

لوووووووول

اي زين سويت :P

Msha3r said...

السلام عليكم،

قضية بر الوالدين من أحزن القضايا على وجه الكرة الأرضية... الشكر لصاحبة الفيديو الرائع و للممثلات الصغيرات تمنياتي لهن بحياة مليئة بالسعادة و الراحة...

شكراً

●• ۈحيدة بليآهُم•● said...

مرحبااا ..

ما شاءالله عليهن ربي يحفظهن ..
شفت الفيديو بس من دوون صووت ..سماعة اللاب مختربة ..

واجوبتك حلـــوة .

دمت فحفظ الرحمن ^^

لولا الأمل said...

Msha3

الشكر موصول لج اختي على تواجدج هنا

حياج الله
واسعدني تواجدج :)

لولا الأمل said...

●• ۈحيدة بليآهُم•●


حساااااااااااافة !!

يالله ان شالله تسمح لج الفرصة وتشوفينه مره ثانيه

شاكر لج تواجدج الاول اختي

لا عدمناه