Saturday, December 5, 2009

الطموح الكويتي والنادل








بعد التخرج من الثانوية بإمتياز مع مرتبة الشرف ..


أبي : نُريدكَ أن تصبحَ دكتور العائلة .. وترفعُ الجبين
أمي : وتعالجنا بيديك الماهرة .. وتغارُ منّي جميع صديقاتي ، خصوصاً أمّ حنين
أختي : وأنا أضمنُ لك الزبائن .. عبير ، هدى ، وياسمين
أتكَفّلُ بإحضارهم لعيادتك .. على أن تعطيني على كل مئة دينار .. فقط عشرين:P


أخي: وأنا أركبُ سيارتكَ الفاخرة .. و " أقز" من السالمية الى القرين


أنا : بكل بلاهة .. إنّ هذا والله ما كنت أحلم به منذ سنيييييين !!


حددت مصيري .. وحجزت تذكرتي الى كندا تابعاً طموحي المُختَلَق !


وبعد ثلاثة سنين ...


أجتمعُ مع عبدالرحمن .. زميلي في الطب .. على طاولة العشاء
أُسِرُّ له بأني من خلال دراستي هنا قد عشقتُ مادة الكيمياء
وأطمحُ أن أكتشف شيئاً جديداً .. وأود أن أكون في هذا المجال من العلماء
وأرجعُ إلى وطني .. وأنهض به بادئاً من حيث إنتهى العظماء
عظماءُ الغرب .. الذين لولا أجدادنا العظماء لما كانوا عظماااااء !


فردّ عبدالرحمن .. وماذا عن دراسة الطب؟
ماذا عن طموحك الأول .. وأمنيات الأم والأخت والأب؟


قاطَعَنا النادل ..


 ماذا أستطيعُ أن أخدمكم فيه؟
فطلبنا ما لذّ من القائمة .. وأشرنا إليه بأننا في عجلة من أمرنا 
ليحضر الطلب بسرعة .. فنعودَ الى كُتُبِنا 


فقال : وماذا تدرسون؟ فأجبنا معاً .. الطب!
فقال : إنها مهنة ممتازة .. ولكن لماذا إخترتم تحديدا الطب؟


فخجِلتُ من إعادة الحوار الذي دار بيني و بين الأهل قبل ثلاثة سنين وسكت
وسكت صديقي لوهلة .. ثم أجاب بأن الطب أفضل من باقي التخصصات
فتلفظتُ متجرّأً .. أن تكون طبيباً يعني أن تكون ذا قوة مادية


أجابني النادلُ ناصحاً .. 
المهم أن تحب المجال الذي تعمل فيه .. لأن هذا هو سر إبداعك في مجالك وسعادتك فيه
أمّا الماده .. فهي شيء ثانوي


فأجبته ضاحكاً .. كأنّك كنتَ تستمعُ الى حديثنا قبل قليل
فتبسم ورحل .. وأيقظني من حلمي المزيّف بصفعةٍ كأنّها السلسبيل


هنا أدركت سرّ تقدمهم وتخلفنا


طموحاتهم هي دراسة ما يحبون
وطموحاتنا هي دراسة ما يحب الغير أن نكون


فشكرا لك أيها النادل 


-----




ملاحظة : المقال نهايته مفتوحه .. فهو لا يعني اني أريد ان أغير تخصصي :)

26 comments:

Princess Adadi ^^ said...

ما قاله النادل هو ماكنت اود قوله

لاحظت ؟؟؟
النادل عندهم يقول هالحجي
واحنا اي انسان كبير وماسك منصب يقولك اتجه لتخصص ما لفوائده المادية

مشكلتنا المادة :/

على قولة ابوي
يقول انا عمري ما شفت جامعة الطلبة فيها سيايرهم اكشخ من الدكاترة
في بريطانيا الطلبة يركبون الباص عشان يروحون الجامعة

الشرهة عالاهل .. والمجتمع

تقدر تختار تخصص غير الطب وتبدع فيه وتكمل دراسات عليا
واذا ابدعت بمجالك اكيد راح يكون لك قوة مثل قوة الدكتور

ولا شفايدة الدكتور اذا كان فاشل وما اييون له وايد ناس

مع اني متأكدة انك ماراح تكون فاشل

الكيميا كانت عشقي ايام الثنوي
كنت استمتع وانا ادرس .. متعة والله متعة

بس عقب 3 سنين صعب تغير
خصوصا انك مغترب
( هذا رايي الشخصي )
بس اذا كنت ناوي فعلا تغير التخصص اكيد راح تكون ال3 سنين اللي عدت خيرة لك

بالتوفيق بدراستك في اي مجال تختاره سواء طب او كيميا

وانشالله يفرحون فيك اهلك
وتاخذ الدكتوراه بالتخصص اللي تدرسه

يعطيك العافية
بانتظار جديدك دوما ^^

حَافِـيَةُ الَقَدمَيّـنْ ولِبَاسِي المَطـرْ said...

فعلا
منو فينا قاعد يبدع بمجاله ؟
غير اللي يحبون مهنتهم
منو فينا قاعد يعطي دم قلبه حق دراسته
غير اللي يحبون مهنتهم
,
لو نملك هالقناعه إن احنا ندرس لنا
مو لغيرنا ولا عشان المسمى الوظيفي
امي كانت تحن ولي الحين تحن
تبيني انا وتوأمي طب
انا ماحب الطب , بس اختي تحبه
اقنعتها بالأخير إن انشالله اذا ربنا قسم
ادخل الهندسه احسها اقرب لي , واقدر استغل المهنه لصالحي لأني احبها
,
يعطيك العافيه

BookMark said...

"هنا أدركت سر تقدمهم وتخلفنا"

تشوفهم اهناك كل واحد ومجاله الي يحبه .. شيف .. مصمم أزياء .. أو حتى سائق أجرة
والكل راضي بعمله لأنه يحبه .. ومقتنع فيه

واحنا ....
أهم شي المادة .. والمسمى الوظيفي .. حتى لو كان أشد البعد عن ميولنا

وبالنسبة لدراستك الطب .. يمكن ماكنت رافضها من البداية .. كنت تمشي بتوجيه من الأهل بس مو معناته ان هالشي ضد رغبتك
ها أنت تسر لصديقك بأنك من خلال دراستك هنا قد عشقت مادة الكيمياء ..
أي أن هذا العشق أتى متأخرا .. وهو اكتشاف جديد اتضح لك بعد هذا المشوار الذي قطعت..
تقدر تبدع فيه عقب .. يكون شي إضافي إلى جانب مهنة الطب

اممم وشنو بعد
إي عجبني النظم بداية البوست :)

بالتوفيق

نبض الأدب said...

طموحاتهم هي دراسة ما يحبون

وطموحاتنا هي دراسة ما يحب الغير أن نكون

***

أصبتم كبد الحقيقة !ا

هنا يدرس - العموم - ما يريده الأهل و يتمنون .. لا ما يتمناه الفرد لذاته !ا

سمعت مرة محاضرة حق د.طارق السويدان يقول : حينما يكون التخصص الدراسي هو نفسه الوظيفة العملية هو نفسه المجال التطوعي يكون الإنسان حينها في أعلى درجات استثمار طاقته .. !ا

يعني الإنتاج و الإبداع يكون في قمة مستوياته ..

بالتوفيق لكم في أي مجال ترغبون و تميلون ..

سـُدّدتُم الخـُطى ..

جنون الصّمت said...

للأسف تلك هي الحقيقة .. ولا ننكر ذلك

لكن .. بالنسبة لتجربتك

فكر فيها عدل ..

السنين راح تضيع بالدراسة .. وبأي تخصص

جرب رغبة الأهل اللي انت درست 3 سنين عشانها واحكم عليها وقرر اذا تقدر تكمل فيها ولا لأ ..

يمكن مثل ما قالت " BookMark " العشق يأتي متأخراً .. !

وحتى لو ما حبيتها .. مع الوقت والتعود والعيش والملح والمهياوة اللي بينكم الوضع راح يتغير :p

يعني مثل اللي متزوجين زواج تقليدي !

لا بينهم حب ولا شي

اقتنعو فـ بعض وتزوجو .. عاشو حياتهم .. مع الوقت حبو بعض .. او تعودو على بعض .. عالاقل صار بينهم معزة ومودة وكل واحد يعني للثاني شي كبير !


الله ييسر امورك ويفتح عليك ان شاء الله

دمت طموح وعالي الهمم : )

لولا الأمل said...

Princess Adadi

مو بس الطلبة يركبون باص
البرفيسورز يركبون باص وبعضهم يركب قاري عشان يحافظ على البيئة !!

كلية طب الاسنان عندنا مستواها عالي .. لازم يكون عندي بكاليريوس عشان اقدم عليها

والحين انا قاعد ادرس باكيلريوس كيميا

فهالاسنين مو قاعده تروح عبث .. اذا خلصت البكاليريوس بقدم ان شالله على الطب .. وبجرب سنه .. اذا ما حبيته اكمل ماستر كيميا :)


الله يعافيج برنسس

توقعت انج اول من يرد لأني أدري انج تحبين هالنوع من المواضيع من خلال الدورات اللي ذكرتيها بمدونتج

شكرا على تواجدك :)

لولا الأمل said...

حافية القدمين

ما شالله عندج توأم؟ :P

الله يخليها لج ان شالله

والله اذا شايفه نفسج اقرب للهندسة .. توكلي على الله ودشي هندسة .. وان شالله تبدعين فيها

على الاقل تحبين شغلج اذا توظفتي :)


الله يعافيج .. مشكوره على تواجدج :)

لولا الأمل said...

BookMark

اي والله صدقتي ..

هالنادل يقولي انه في احصائية تقول اكثر المنتحرين بالعالم هم اطباء الاسنان على كثر فلوسهم

يقول انا ما اطلع فلوس .. بس احب شغلي وايد .. وهذا اللي مخليني اشتغل

:)

هذي النقطة اللي مو مخليتني اتخذ قرار نهائي

لأني ما جربت الطب .. فمادري راح احبه ولا لأ

لازم اجربه عشان احكم

انا كنت اكره الكيميا .. وحبيتها هني .. وان شالله هالشي يصير مع الطب بعد


تسلمين اختي ..من ذوقج

وردج دايما مميز :)

لولا الأمل said...

نبض الأدب

مو ذابحني الا هالدكتور المبدع

الله يطول لنا بعمره وننهل من علمه اكثر واكثر

بالفعل صدق ..

الانسان فيه طاقة ما تطلع الا اذا توفرت الببئة اللي ذكرتيها :)

أسعدني تواجدج :)

لولا الأمل said...

جنون الصمت

لوووووول .. المهياوة هي اللي حببتني بالكيميا

له مفعول عجيب :P

>> عاد للحين ما جربته .. نجربها ان شالله على يوم

عجبني التشبيه وااايد

لووول تخيلت انه يكون بيني وبين ضروس العالم موده :P

والله صاجه .. ساعات الواحد من كثر الممارسه يعشق الشغله ويبحث عن طرق عشان يبدع فيها

تسلمين عالرد الرائع

دمت بالقرب :)

Kandroz said...

لا لا يا بوطلي لا لا :/
ابدااااااااااا مو جذي تخربها


يلاااااااا عاد طير زين :p
يقولوله طب يقول كيميا :P

اقوووووووووووول
جابل كتابك احسنلك وبلا تخاريف احسنلك


عاد تدري بو طلي كنت احب الفيزيا
وفكرت ادش جامعة الكويت تخصص فيزيا بيوم من الايام
بس شفت سالفة الدكاتره عندنا بطيخ
فقلت عزااااه امريكا طال عمرك :p


حجي
شق حيلك بدراستك
وصدقني دام انك استخرت ان شاء الله بتشوف خيرتك

حجي الشي الموحلو باجر لي تخرجت من كيميا شنو بتكون مدرس ؟
اوكي خذيت ماجستير ودكتوراه :/
وصرت دكتور بالجامعه بعد زليون سنه دراسه

ياخي كاهو الطب يايلك على طبق من ذهب :P
انت بس شق حيلك
وادعيلي :P

يلا يلا

رااااااااجع بشوقي ولهفتي من غربتي
راجع لربعي وديرتي ومحبوبتي

Kandroz said...

اهاااااااااااااااااا

عيل طال عمرك

يخرب بيت السالفه اذا جذي
يعني قعد تدرس بكالاريوس كيميا

طلعت جذي السالفه هااا ؟
عيل يخرب بيت الدراسه :p

قزرهااااااااا
ادرس الحين ولا تحاتي عشان لما تتخرج تشوف شنو تبي طال عمرك

وبعدين ترا نفس السالفه
دكتور ودكتور
نفس الشي ترا

بس كل اللي عليك قزرها على افا الكيميا
وادعييييييييييلييييييييييييييي


واهم شي انك
تدعيلي ;-)

لولا الأمل said...

kandroz

لووووول .. اول رد لك .. نفس كلام اخوووي بالضبط

هذي اسطوانته المعروفه كل ما رديت الكويت :P

-----

لوووووووول بالرد الثاني قلبت 180 درجة :P

ما ينعرف لك :P

لوول

بالتوفييق يالحبييب

Engineer A said...

كلام النادل صحيح .. فهم في الغرب يدرسون ما يحبون .. وينخرطون مجال العمل الذين يختارونه هم لأنفسهم .. بينما نحن ندرس ما يريده أبائنا و أمهاتنا .. بالإضافة إلى تفكيرنا بالعائد المادي من وراء مهنا .. خصوصاً أن بعض المهن هنا - على الرغم من أهميتها في العالم- فقيرة بالمردود المادي والمعنوي .. يعني لا مسمى وظيفي و لا معاش!!!

أنا درست الهندسة علىالرغم من عشقي للأدب واللغات ..ما أقول أكره تخصصي .. بس ما أحبه!

يعطيك العافية و تقبل مروري :)

لولا الأمل said...

Engineer A

درستي هندسة لأنه مستقبلها اقوى

عشان جذي الاهل يقحمونا بهالتخصصات .. يدرون انه مستقبلها اقوى

يمكن الشخص يحب الادب .. لكن بالنهاية يصير مدرس عربي !

فتفكيرنا الاول بالمعاش

اسعدني تواجدك اختي الأول

واتمنى يتكرر هالتواجد :)

سمو الأميرهـ ..ツ said...

السلآآم عليكم :)

اممم
فعلاً مثل ما قلت
الكل همهم الناس
و رضا النآس غآية لا تدركـ
اامممم
تخصصي اللي أنا فيه حاليأ
عاجبني نوعأ ما
لكن
جامعتنا المصون
ما يمدحون تدريسها فهالتخصص
فناوية أغير ع الكورس اليآي
إن شاء الله
لانه أساساً كنت أبي طب
بس ما صار نصيب
ولحد الحين عندي أمل
إني بغير
الناس تظن إني أبي الطب عسب ينقال لي
دكتوره
بس ما احس تهمني المسميات والألقاب
كثر إني اكون مرتاحه وحابه اللي أدرسه
**
أما عن الكيمياء
اظن مثل ما قالوا اخواني وخواتي المدونين
صعب تغير
بمأ أنكـ تدرس فالخارج
وهالشي بيضيع 3 سنين من دراستكـ
بس تقدر ع الأقل تقرا مقالات عن الكيميا
خآرج نطاق دراستكـ
بما إنكـ تحب الكيميا
+++
بوست رآئع أخويه
شكراَ ع الطرح الراقي
دمتَ ومن تحب بألف خير
:)

New Bride said...

هذي مشكلتنا

انا من تخرجت كل يوم اسأل نفسي ليش تخصصت اداب انجليزي ؟؟ ما لقيت جواب !!اوكي اكتسبت لغة بس اللغة بكل تخصص الواحد يقدر يتعلمها

وحده من رفيجاتي تدرس اطفال من سن 3 الى 4 سنين شنو بتشتغلون لما تكبرون ؟؟ طبعا عيالنا ماكو طموح حدهم ضابط و بالجيش وواحد جاوبها ليش افكر توني صغير
قام واحد من احدي الجنسيات العربية و قال انا عاوز ابقى عالم ذرة !!!شوف الطموح مو عيانا


يالله الحمدالله على كل حال


بالتوفيق

Engineer A said...

إن شاء الله مو مروري الأخير :)

العازمي said...

ما اجمل هذا الكلام
--
طموحاتهم هي دراسة ما يحبون
وطموحاتنا هي دراسة ما يحب الغير أن نكون
--

اتمني لك التوفيق

لولا الأمل said...

سمو الأميره

اذا هي المعاناة الخليجية .. وليس الكويتية فقط !

ادرسي التخصص اللي تحبين .. عسب تتوظفين بالمكان اللي تحبين

اذا تحبين الطب .. حاولي ترفعي معدلك وتحولي على كلية الطب

---

بالنسبة لي .. عالم الطب يستحق التجربة

---

اضافات جميلة من حضرتكم

اسعدني جدا تواجدج اختي

واتمنى يتكرر المرات اليايه :)

لولا الأمل said...

New Bride

لووول .. احنا ما عرفنا معنى كلمة ذرة الا لما صرنا بالثانوي :p

احيانا الانسان يدرك متأخرا حقيقة المجال اللي يدرسه

لكن هل هذا يعني اني ارد الجامعة وادرس تخصص يديد ؟

انا رايي الشخصي .. مدام اني خلاص لصقت بهالتخصص .. وانا ما اكرهه .. والدليل اني درسته اربع سنين

اطور نفسي اكثر بهالمجال .. واحاول ابدع فيه واتعمق فيه عشان احس بفائدته علي

وبالنسبة لطموحات اليهال هذا دور الاسرة

يزرعون فينا انا احنا دكاترة واحنا تنابل .. ويزرعون فينا انا احنا عساكر واحنا عباقره

اسعدني جدا تواجدج اختي :)

ولا تحرمينا من طلات اخرى

لولا الأمل said...

العازمي

انت الاجمل والاروع

تحياتي لك

واتمنى رؤية هالاسم مرات عديدة

> همسة : مدونتك عجيبة .. علمتني شلون اعدل السلايد بار لوول تسلم

Msha3r said...

الطموح صفة في غاية الروعة...

لم يعجبني بطاقة الإتهام المهداة للأسرة.. الاختيار الأول و الأخير لنا، نحن من يقرر ماذا نريد أن نصبح في المستقبل.. ما على الأسرة فقط فعلها هو تطوير أو صقل مواهبنا إن اكتشفوها في صغرنا حتى نبدع به في كبرنا و تشجيعنا على ما هو لصالحنا...

أعجبني الطرح. تقبل مروري ^^.

لولا الأمل said...

Msha3r

كثير منا لا يعرف ما المجال الذي يحب في هذه المرحلة .. فقرارنا يتم بناء على رغبة الاسرة لأننا نثق بأنهم يريدون لنا الأنفع

لا شك عبء كبيير يقع علينا .. ولكن الاسرة لها دور

اتفق معاج اختي اني قسيت باللفظ .. وانا اعتذر

واتقبل انتقادج بصدر رحب

اسعدني جدا مرورج .. واسعدني اكثر النقد البناء المطروح من قبلكم

لا تحرمينا من تواجدج :)

:: بـوح الصمـت :: said...

:)

الزملاء كفوا ووفوا .. عسى الله يوفقكم ويرزقكم من الخير فوق ما تتمنون يارب :)

مدونة جميلة جداً :)

لولا الأمل said...

بوح الصمت

وجودك بحد ذاته اضافة رائعة لي

دمت متواجده هنا